Pekin nüvə sınağı ilə bağlı ittihamları rədd edir

ABŞ Çini gizli nüvə sınağı keçirməkdə ittiham edib.

Vaşinqtonun məlumatına görə, Pekin bu sınağı 2020-ci ildə beynəlxalq nəzarətdən gizlətməyə çalışaraq həyata keçirib. 

ABŞ Dövlət katibinin silahlara nəzarət üzrə müavini Tomas Dinanno bildirib ki, Çin hərbçiləri yüzlərlə ton gücündə nüvə partlayışı hazırlayıb həyata keçiriblər. Onlar seysmik monitorinqin effektivliyini azaltmaq üçün xüsusi üsullardan istifadə ediblər.

ABŞ iddia edir ki, Çinin gizli sınağı 22 iyun 2020-ci ildə baş tutub. Bu, Çinin nüvə sınaqlarının qadağan edilməsi ilə bağlı öhdəliklərini pozur. Pekin ittihamları rədd edib.

Çin ilk dəfə nüvə sınağını 16 oktyabr 1964-cü ildə Lobnor gölü yaxınlığında gerçəkləşidirib. Ötən əsrin ortalarından bu silaha sahib olan ölkə 1964-cü ildən bəri ümumilikdə 46 nüvə sınağı keçirib. Rəsmi Pekinin arsenalında, müxtəlif mənbələrə görə, hazırda 350-dən 600-dək nüvə başlığı olduğu bildirilir. Çin bu kimi təlimlərin sayına görə dünyada ilk beşlikdə yer alır.