Pentaqon rəhbərindən kritik açıqlama - Baku TV

ABŞ-nin müdafiə naziri Pit Heqset Venesuelada genişmiqyaslı əməliyyatın keçiriləcəyini istisna etməyib.

O bu barədə "CBS" telekanalına müsahibəsində bildirib.

ABŞ-nin Venesuelanı necə idarə etməyi planlaşdırdığı ilə bağlı suala "Vaşinqton qaydaları təyin edəcək. Nəticədə, biz bundan sonra nə baş verəcəyini idarə edəcəyik", – deyə o cavab verib.

Pentaqon rəhbərindən “Bu, ABŞ-nin Venesuelada genişmiqyaslı əməliyyata başlaya biləcəyi anlamına gəlirmi?” soruşulduqda isə Pit Heqset ordunun hazır olduğunu vurğulayıb.

Venesuela Ali Məhkəməsi ölkənin icraçı vitse-prezidenti Delsi Rodrigesə ölkə Konstitusiyasına və qanunlarına ciddi şəkildə uyğun olaraq dərhal respublika prezidentinin səlahiyyətlərini yerinə yetirməyi tapşırıb. Bu qərar 2026-cı il yanvarın 3-də baş verən məlum hadisə ilə əlaqədar verilib.

Bu arada ABŞ-nin Karakasdakı mülki və hərbi obyektlərə hücumundan sonra minlərlə turist Karib adalarını tərk edə bilmir.

"The Daily Mail" qəzetinin yazdığına görə, ölkənin beynəlxalq hava limanlarında ümumilikdə 300-ə yaxın aviareys təxirə salınıb.