PKK-nın Suriya qolundan Öcalanın çağırışına reaksiya | Silahı yerə qoyacağıq, amma...

PKK terror təşkilatının Türkiyədə həbsdə olan lideri Abdullah Öcalanın çağırışına qruplaşmanın Suriya qolu kimi tanınan PYD-nin lideri Salih Müslimdən cavab gəlib.

Bu barədə Türkiyə mətbuatı məlumat yayıb. Qeyd olunub ki, PYD lideri Öcalanın müraciətini dəstəkləyib.

“Əgər siyasi qrup kimi fəaliyyət göstərməyimizə icazə verilərsə, silahı yerə qoymağı qəbul edirik”, ‒ deyə o bildirib.

İraq Kürdüstanı da PKK terror təşkilatının üzvlərinin silahı yerə qoyması ilə bağlı təşəbbüsləri dəstəkləyir. Bu barədə İraq Kürdüstan Regionunun başçısı Neçirvan Bərzani deyib.

O, bu çağırışı müsbət qarşıladıqlarını bildirib. “PKK bu çağırışa sadiq qalmalıdır. Bu addımın sabitliyə töhfə verəcəyinə ümid edirik. Beləliklə, daha yaxşı nəticə əldə etmək olar. Silahlı mübarizə artıq əhəmiyyətini itirib”, ‒ deyə N.Bərzani bildirib.

O həmçinin qeyd edib ki, Türkiyə Prezidenti Rəcəb Tayyib Ərdoğan və Ədalət və İnkişaf Partiyası hakimiyyətə gəldiyi ilk gündən etibarən sabitlik üçün çalışır.