Putin Trampı çıxılmaz vəziyyətə saldı | Rusiya Donetskə hərbçilər topladı

“Rusiya Ordusunun əsas qüvvələri yay hücum planı üzrə Pokrovsk istiqamətində cəmləşib. Məqsəd Donetsk vilayətinin sənaye şəhəri olan Konstantinovka istiqamətində irəliləməkdir. Rusiya Donetskə 100 min hərbçi toplayıb”.

Bu barədə Ukraynanın “Xortitsa” hərbi qruplaşmasının nümayəndəsi Viktor Trequbov bildirib.

Daha əvvvəl Ukrayna Silahlı Qüvvələrinin baş komandanı Aleksandr Sırski hərbçilərin Kursk və Belqorodda möhkəmləndiyini deyib.

Rusiya Prezidentinin mətbuat katibi Dmitri Peskov brifinqdə bu barədə danışmayıb, bircə onu deyib ki, Rusiya Ordusu irəliləyir.

Bununla yanaşı, D.Peskov bildirib ki, Donald Trampın Moskvanı bombalayacağı ilə bağlı Vladimir Putini hədələməsinə aid səs yazısının feyk olub-olmadığı barədə Kreml məlumatsızdır. Qeyd edək ki, bu barədə informasiya CNN-də yayılıb.

“Vladimir Putinə dedim ki, Ukraynaya hücum etsəniz, Moskvanı bombalayacağam. Siz mənə başqa seçim saxlamırsınız. V.Putin mənə inanmadığını desə də, sözlərimə 10 faiz inanmışdı”, ‒ deyə Donald Tramp bildirib.

Oxşar hədə Çin lideri Si Cinpinə qarşı da səsləndirilib.

“Çin Tayvana qoşun yeritsə, ABŞ Pekini bombalayacaq” deyəndə o məni dəli sayırdı”, ‒ D.Trampın səs yazısında bildirilir.

Məlumata görə, D.Tramp ikinci dəfə prezident seçilmək istəyərkən 2024-cü ildə Nyu-York və Floridada belə çıxışlar edib və reytinq yığıb. Ağ Evdən isə məsələyə münasibət bildirilməyib.