Putinin “Kinjal”ı Trampın “Patriot”una uduzur? - Rusiya lideri hamını təəccübləndirdi

“Say barədə hələ razılaşmamışıq, amma Ukraynaya “Patriot” sistemləri göndəriləcək, çünki müdafiəyə ehtiyacları var. Bu komplekslərin pulunu biz yox, Avropa İttifaqı ödəyir. Vladimir Putin hər kəsi təəccübləndirir. Səhər yaxşı danışır, axşam düşən kimi hamını bombalayır. Bu isə mənim xoşuma gəlmir”.

Bunu jurnalistlərə açıqlamasında ABŞ Prezidenti Donald Tramp deyib.

Qeyd edək ki, Ukraynaya hansı “Patriot” sistemlərinin göndəriləcəyi məlum deyil. Sistem 150 kilometr məsafədə istənilən obyekti vura bilir. 2023-cü ildə ABŞ Ukrayna Ordusunun “Patriot” vasitəsilə Rusiyanın “Kinjal” raketini vurduğu barədə məlumatı təsdiqləyib.

ABŞ, Almaniya, Polşa, Ukrayna, Yaponiya, Qətər, Səudiyyə Ərəbistanı və Misir də daxil olmaqla indiyədək 19 ölkəyə “Patriot” kompleksləri çatdırılıb. Kompleksin qiyməti 1 milyard dollardan artıqdır. 400 milyon dollar sistem, 690 milyon isə raketlərin ümumi dəyəridir. Raketlərin hər biri 4 milyon dollara satılır.

Bu sistem aviabombalar atılan, PUA və raket hücumlarına məruz qalan Ukrayna üçün hava və su kimi lazımlıdır. Çünki Rusiya mülki və strateji obyektləri hədəf alır. Raket və təyyarələrin vurulmasında “Patriot” əhəmiyyətli sayılsa da, 1000 dollarlıq PUA-nı məhv etmək üçün 4 milyonluq raketdən istifadə sərf etmir.

Rusiya “Patriot” raket sistemlərinin Ukraynaya tədarükünü eskalasiya sayır. Bu ölkənin Xarici İşlər Nazirliyinin sözçüsü Mariya Zaxarovanın fikrincə, bu proses sülhün əldə olunmasına mane olacaq.