Qalmaqallı sənəd necə imzalandı? - Paşinyan bilinməyənləri açıqladı

“Vaşinqtona səfərim çərçivəsində Ağ Evdə görüşlərin olacağı planlaşdırılmayıb”.

Bu sözləri Ermənistanın Baş naziri Nikol Paşinyan deyib.

Onun sözlərinə görə, ABŞ-nin vitse-prezidenti Ceyms Devid Venslə görüş günü “Milli dua səhər yeməyi”ndə iştirak etmək üçün oraya gedib və tərəflər arasında qarşılıqlı görüş və söhbət etmək istəyi yaranıb. Görüş təkbətək olmayıb və nümayəndə heyətinin üzvləri də iştirak ediblər.

Paşinyan əlavə edib ki, görüş kifayət qədər uzun çəkib, çox vacib və səmərəli olub.

Bundan əlavə, Baş nazir bildirib ki, Ermənistan-Amerika strateji tərəfdaşlıq sənədinin imzalanması ABŞ-də artıq seçkilər keçirildiyi bir vaxtda baş verib. ABŞ-nin siyasi mədəniyyətinə görə, keçid dövründə keçid komandaları formalaşdırılır və bütün sənədlər yalnız gələcək administrasiyanın razılığı ilə təsdiqlənir. Yəni imzalanan sənəd Trampın komandası ilə razılaşdırılaraq hazırlanıb.