Qazaxıstanda xüsusi əməliyyat : 40 nəfər saxlanıldı

Qazaxıstanın hüquq-mühafizə orqanları Qaraqanda vilayətində cinayətkar qrupa qarşı xüsusi əməliyyat həyata keçirib, 40 nəfər saxlanılıb. Bu barədə ölkənin Daxili İşlər Nazirliyi məlumat yayıb.

Cinayətkar qruplaşmanın üzvləri ictimai asayişi pozaraq odlu silahdan istifadə etməklə dəfələrlə qarşıdurma yaradıblar. Keçmiş hüquq-mühafizə orqanları və təhlükəsizlik təşkilatlarının əməkdaşları da daxil olmaqla qrupun 50-yə yaxın fəal üzvü olub.

Xüsusi əməliyyat zamanı sözügedən vilayətin iri sənaye obyektlərində, o cümlədən beynəlxalq koorparasiyaya məxsus “Arcellor Mittal Temirtau”da inventarların oğurlanması faktı müəyyən edilib. Bundan başqa, hüquq-mühafizə orqanlarının əməkdaşları qrup üzvlərinin bir neçə üstü açılmamış ağır və xüsusilə ağır cinayətlərdə iştirakını müəyyən ediblər.

“Xüsusi əməliyyat zamanı 100-dən çox axtarış aparılıb, 9 odlu silah, 200-ə yaxın döyüş sursatı, qumbaraatan, trotil, qumbaralar, saxta möhürlər, dini ədəbiyyat, külli miqdarda pul, daşınar və daşınmaz əmlak, habelə uzaqdan dinləmək üçün xüsusi texniki avadanlıq müsadirə olunub, həmçinin 40 nəfər təqsirləndirilən şəxs polisə təhvil verilib, - deyə Daxili İşlər Nazirliyindən bildirilib. Faktla bağlı əməliyyat-istintaq tədbirləri davam etdirilir.