Qazaxıstanın keçmiş prezidenti etiraf etdi: 2-ci arvadı və 2 oğlu var

Qazaxıstanın sabiq prezidenti Nursultan Nazarbayev ilk dəfə öz memuarında ikinci həyat yoldaşı və həmin qadından iki oğlu olduğunu etiraf edib.

“Mənim həyatım” xatirələr kitabında o, 18 yaşlı Tauman və 17 yaşlı Bayken adlı oğullarından və ikinci xanımı Asel İsabayeva ilə münasibətindən danışıb.

Siyasətçi bildirib ki, A.İsabayevanı ilk dəfə Qazaxıstanın cənub-şərqindəki Taldıkorqan şəhərinə səfəri zamanı görüb. Qız dövlət başçısını təyyarənin pilləkənlərində gül dəstələri ilə qarşılayıb.

“Belə bir mərasimdə iştirak etmək üçün yerli ən gözəl qızlar seçilir”, – deyə sabiq prezident bildirib.

N.Nazarbayev qeyd edib ki, bundan sonra İsabayevanın obrazı onun yaddaşından getməyib. Bir gün o, qızın “Miss Qazaxıstan” müsabiqəsində Qran-pri qazandığını görüb və onu axtarıb tapıb.

“Aselin həm xarici görünüşündə, həm də düşüncəsində axtardığım bir çox keyfiyyətləri gördüm. Ən əsası isə illərdir davam edən mənəvi tənhalıqdan qurtuldum”, – deyə siyasətçi vurğulayıb.

Daha sonra onlar müsəlman adəti ilə evləniblər. N.Nazarbayev bildirib ki, 1962-ci ildən evli olduğu xanımı Saraya, həmçinin qızları Dariqa, Dinara və Aliyəyə hər şeyi danışıb.