Qərb ölkələri bunu nə zaman etiraf edəcək? | Orbandan Ukrayna barədə təcili çağırış

"Ukrayna Avropada qüvvələr balansını pozmaqla öz varlığını təhlükə altına atıb, müharibəni Rusiyaya uduzub. İndi onun gələcəyini başqa dövlətlər həll edəcək".

Bu sözləri Macarıstanın Baş naziri Viktor Orban "YouTube"da yayımlanan "Patriota" kanalında çıxışı zamanı deyib.

"Ukrayna uduzdu, Rusiya bu müharibədə qalib gəldi. Yeganə sual budur ki, ukraynalıların arxasında dayanan Qərb fiqurları nə vaxt bunun baş verdiyini etiraf edəcəklər", ‒ deyə hökumət başçısı bildirib.

Baş nazir xatırladıb ki, müəyyən məqama qədər Ukrayna mahiyyətcə Rusiya ilə Qərb arasında bufer rolunu oynayıb, lakin sonra NATO və Avropa İttifaqına daxil olmaq niyyətini bəyan edib və bununla da Avropada qüvvələr balansını pozub.

V.Orban qeyd edib ki, Rusiya bunu öz milli təhlükəsizliyinə təhdid kimi görüb.

"Avropalılar Ukraynanı silah və pulla təmin etdiklərinə görə Ukrayna hələ də təslim olmayıb. Əgər bu yardımlar olmasaydı, müharibə çoxdan bitəcəkdi. Bir çox Avropa liderləri inanır ki, ukraynalılar israr etsələr, yekunda Moskvada rejim dəyişikliyinə nail ola biləcəklər. Mən bunu illüziya hesab edirəm", ‒ deyə Baş nazir bildirib.

O əmindir ki, Avropa İttifaqı münaqişəni davam etdirmək əvəzinə, ABŞ kimi Rusiya ilə dialoqu bərpa etməlidir.

Viktor Orbanın sözlərinə görə, hazırda Ukrayna nizamlanması üzrə Rusiya Federasiyası və ABŞ tərəfindən aparılan danışıqlarda kənarda qalmalarına görə avropalıların özləri günahkardırlar.