Qərbi Afrika geosiyasi qarşıdurma meydanına çevrilir | Hərbi nüfuz üzrə rəqabət gücləndi

Rusiya və ABŞ Qərbi Afrikada siyasi və hərbi nüfuz uğrunda rəqabəti gücləndirir.

"Newsweek” nəşrinin yazdığına görə, Rusiya Sahel Dövlətləri Alyansı – Mali, Niger və Burkina-Faso ilə tərəfdaşlığını gücləndirib, indi isə dənizə çıxışı olmayan bu müttəfiqlərinə dəstək məqsədilə Toqo sahilində yerləşən Atlantik limanına çıxış əldə etmək istəyir.

Toqonun həm Rusiya, həm də ABŞ ilə əməkdaşlıq etmək istəməsi Moskvanın bu ölkədə nüfuzunu artırmaq cəhdlərini daha təhlükəli edir.

ABŞ Dövlət Departamentindən bildirilib ki, Rusiyanın məsuliyyətsiz və istismarçı fəaliyyəti mülki əhalinin əziyyət çəkməsinə, yerli narazılıqların artmasına və terrorçuların daha asan cəlb edilməsinə səbəb olur. Rəsmi Vaşinqton bütün ölkələri Rusiyanın müdafiə sektoru ilə əməkdaşlıqdan çəkinməyə çağırıb.

Analitik Liam Karrın sözlərinə görə, əgər Ukraynada sülh əldə olunarsa, Kreml yüzminlərlə hərbçini evə qaytarmaq məcburiyyətində qalacaq ki, bu da çətin qərardır. Ən asan variant həmin qüvvələri Afrikada yerləşdirmək olacaq. Bu isə Rusiyaya qitədə daha çox təsir gücü verəcək.

Liam Karrın fikrincə, ABŞ qanunvericiliyi demokratiya və insan haqları sahəsində pis göstəriciləri olan Sahel ölkələrinə hərbi yardımın məhdudlaşdırılmasını tələb edir. Bu isə Rusiya üçün əlavə manevr imkanları yaradır.