Qəzzada atəşkəs reallaşacaq? - ABŞ-dən açıqlama

İsrail, ABŞ və HƏMAS Qəzza zolağında girov götürülən onlarla qadın və uşağın azad edilməsi üçün Qətərin vasitəçiliyi ilə yeni təkliflər paketi üzərində çalışır.

Bu barədə “The Times of Israel” nəşri yazıb. Xəbərdə qeyd olunub ki, tərəflər ilk dəfə beş günlük atəşkəs elan edilməsinə bu qədər yaxındır.

Nəşr yazır ki, razılaşma əldə olunarsa, İsrail və HƏMAS beş gün müddətinə bütün hərbi əməliyyatları donduracaq, qruplaşma üzvləri oktyabrın 7-də İsrailə hücum zamanı girov götürdükləri 240-a yaxın insandan 50 nəfərini ilkin mərhələdə azad edəcək. Sonrakı hər 24 saatdan bir daha 50 nəfərin azad edilməsi planlaşdırılır.

Atəşkəs tək əsir və girovların dəyişdirilməsini deyil, həm də humanitar yardımların artırılmasını və yanacaq ehtiyatının Qəzza zolağına çatdırılmasını nəzərdə tutur.

Amerika Birləşmiş Ştatlarının Milli Təhlükəsizlik Şurasının sözçüsü Con Kirbi isə bildirib ki, tərəflər hələ razılığa gəlməyib, amma bu istiqamətdə xeyli irəliləyiş var.

“The Washington Post” nəşri də dərc etdiyi hesabatda danışıqların artıq həftələrdir davam etdiyini və Dohada müəyyən razılıq əldə olunduğunu yazıb.

Xatırladaq ki, İsrailin Baş naziri Benyamin Netanyahu noyabrın 11-i girovların bir qisminin azad edilməsi ilə bağlı yayılan xəbərləri təkzib edərək hələ bir razılaşmanın əldə olunmadığını bildirmişdi.