Qəzzada son vəziyyət | Ölənlərin sayı ilə bağlı dəhşətə gətirən rəqəm

10 aydan artıqdır ki, Qəzzada müharibə davam edir.

İordan çayının qərb sahilinin hədəf alındığı bir vaxtda İsrail Ordusu paralel olaraq Qəzza və Livana da hücumlar həyata keçirir. Həm İsrail, həm də Misirin sərhədlərini əsasən bağlı saxlaması da Qəzzada onsuz da zəifləmiş iqtisadi və humanitar vəziyyətin daha da pisləşməsinə şərait yaradıb.

Münaqişə başlayandan bu günə qədər açıqlanan statistika da dəhşət saçır.

Son rəqəmlərə görə, ötən 328 gündə müharibədə 41 081 nəfər fələstinli həlak olub. Ölənlərin 16 mindən çoxunu azyaşlılar təşkil edir. 93 534 nəfər isə yaralanıb, 10 mindən çox insan itkin düşüb. Hər saat Qəzzada 6-sı uşaq olmaqla ortalama 15 nəfər ölür, 35 nəfər yaralanır.

Əraziyə 42 bomba atılır və 12 yaşayış binası yerlə-yeksan edilir. İordan çayının qərb sahilinə gəldikdə ölənlərin sayı 646-nı, yaralananların sayı isə 5 400 nəfəri keçib. İsrail tərəfdən isə açıqlanan rəqəmlərə görə, 1 139 nəfər həlak olub, 8 730-dan çox insan isə xəsarət alıb.

Qətərin “Əl-Cəzirə” telekanalı isə bildirib ki, Qəzzadakı tikililərin yarısından çoxu artıq dağıdılıb. Yol infrastrukturunun və əkin sahələrinin 65 faizi də yararsız hala düşüb. Müharibənin qurbanları yalnız bununla da bitmir. Münaqişə nəticəsində əksəriyyəti fələstinlilər olmaqla 125-dən çox jurnalist həlak olub. Onlar arasında livanlı, israilli jurnalistlər də var.

Qeyd edək ki, bütün bunların fonunda İsrailin Baş naziri Benyamin Netanyahu Qəzzadakı müharibə barəsində açıqlama verib. O, cəbhədə aparılan əməliyyatların dayandırılmadığını və bu başlıq altında paylaşılan xəbərlərin yalan olduğunu bildirib. Baş nazir hələ də hekayənin, yəni münaqişənin sonunun gəlmədiyini söyləyib.