Qorxaq olmamalıyıq | Makrondan müharibə ilə bağlı sərt çıxış

"Bizim bir məqsədimiz var: Rusiya bu müharibədə qalib gələ bilməz və qəti şəkildə qalib gəlməməlidir".

Bu sözləri Fransa Prezidenti Emmanuel Makron söyləyib.

"İki ildir ki, biz Ukraynaya kömək edirik və əgər hər hansı bir problem olsa, bütün məsuliyyət yalnız Rusiyanın üzərinə düşəcək. Əgər bu gün zəif olmağı seçsək, müharibədə sərhədləri olmayan, bütün potensial sərhədləri aşan birinin qarşısında sülhü yox, məğlub olmağı seçmiş olacağıq. Müharibə artıq Avropa torpağına gəlib çatıb. Strasburqla Lvov arasında təxminən 1500 kilometrdən də az məsafə var. Təsəvvür edin ki, bu ölkədə müharibə başlayıb.

Onu demək istəyirəm ki, bütün bunlar fantastika deyil və münaqişə bizdən uzaqda deyil. Saydığım variantların hamısı baş tuta bilər. Məsuliyyət isə yalnız və yalnız Kremlin üzərinə düşür. Biz heç vaxt hücuma keçməyəcəyik və buna təşəbbüs göstərməyəcəyik. Çünki Fransa sülh tərəfdaşıdır, lakin bu gün Ukraynada sülhün bərqərar olması üçün qorxaq olmamalıyıq. Unutmayın ki, əgər Rusiya bu müharibədə qalib gəlsə, Avropanın etibarı yerlə yeksan olacaq", – deyə Makron bildirib.