"Bu hücum əvvəlkindən də böyük ola bilər" | ABŞ İsrailə icazə verəcək? - Baku TV

İsrail İrana qarşı hərbi əməliyyatları bərpa etməyə hazırdır və hücumları həyata keçirmək üçün ABŞ-dən "yaşıl işıq" gözləyir.

Bu barədə İsrailin müdafiə naziri İsrael Kats bildirib.

Onun sözlərinə görə, İsrail Ordusu müdafiə və hücuma tam hazırdır, hədəflər artıq müəyyən olunub.

O həmçinin iddia edib ki, bu, əvvəlkindən daha böyük və daha zorakı bir əməliyyat ola bilər və İran infrastrukturunun əsas elementlərini hədəf alıb.

Bu arada, ABŞ lideri Donald Tramp Livan və İsrailin ABŞ-dəki səfirlərinin Ağ Evdə keçiriləcək növbəti görüşündə iştirak edə bilər. Bu barədə tanınmış jurnalist Nadya Bilbassi-Çarters sosial mediada yazıb.

"Trampın iştirakı əhəmiyyətli olacaq. Livan tərəfi atəşkəsi uzatmaq istəyir və İsraili jurnalistlərin, ilk yardım göstərənlərin və dini yerlərin qorunmasını təmin etməyə çağırır, İsrail isə iki ölkə nümayəndələri arasında əlaqələri cinayət hesab edən Livan qanununun ləğvini istəyir", – deyə jurnalist bildirib.

Qeyd edək ki, aprelin 14-də Vaşinqtonda Livan-İsrail danışıqlarının ilkin mərhələsi keçirilib. Görüş atəşkəs razılaşmasının əldə edilməsinə yönəlmiş sülh danışıqlarının başlama tarixini müəyyən etmək məqsədi daşıyıb. Aprelin 16-da ABŞ lideri Donald Tramp İsrail və Livanın Şərq vaxtı ilə saat 17:00-dan etibarən 10 günlük atəşkəs barədə razılığa gəldiyini açıqlayıb.