"İnsan qəssabxanası" ilə bağlı tükürpərdici faktlar | Ağlını itirənlər, 30 kilo arıqlayanlar...

Bəşər Əsəd rejiminin süqutu dünyada məzlum suriyalıların azadlığa qovuşması baxımından böyük əks-səda doğurub.

Suriya həbsxanalarında azadlığın nə olduğunu unudan, ölkədə baş verənlərdən bixəbər minlərlə məhbus vardı.

Yerin 3,8 metr dərinliyində qazılmış xəndəklər təsəvvür edin. Havasız, qaranlıq və nəmişlik. İndi də gözünüzün önünə 7 il ayaq üstə yatan məhbusları gətirin.

Bu dəhşətli mənzərələr Suriyanın diktator rejiminin insanlıqdan uzaq Sednaya həbsxanasında qeydə alınıb.

Xalq arasında onu bəyaz bina adlandırırlar. Rəngi ağ olsa da, içəridəkilər ömürlərinin ən qara günlərini burada yaşayıblar.

Divarlarına insan hayqırtısı hopan bu xarabalıq Dəməşq yaxınlığında 1980-ci ildə inşa edilib. Hakimiyyətlərini qoruyub saxlaya bilmək üçün hər yola əl atan Əsəd rejimi ünvanlarına xoş olmayan bir ifadə işlədənləri belə bu cəhənnəmə atırdı.

İnsan haqları təşkilatları tərəfindən “insan qəssabxanası” kimi tanınan Sednaya həddindən artıq qapalı idi və indiyədək həbsxananın içərisindən bir görüntü belə çəkilməmişdi, ta ki hakimiyyət devrilənə qədər. Ortaya çıxan görüntülər dəhşət saçır.

Bu həbsxanada fiziki şiddətə dözməyib ölənlər xoşbəxt sayılırmış. Bu barədə Sednayanın hər gün 3 dəfə döyülən 25 illik sakini bildirib.

Bu yeraltı səltənətin zülmə düçar məhkumları arasında sağ qalmağı bacarıb nitq qabiliyyətini itirənlər, doğmalarını tanımayanlar, 30 kiloqrama qədər arıqlayanlar da var.

Bəşər Əsəd rejimi edam üsulu kimi ən dəhşətli metodlara əl atıb. Kimisi şirlərə yedirdilib, kimisi güllələnib, kimisi dar ağacından asılıb. Sonra isə cəsədləri torpağa tapşırmaq çox vəsait və əziyyət tələb edir deyə rejim bu prosedurun da yüngülləşdirilməsinin yolunu kimyəvi üsulda tapıb. Öldürülmüş məhbusları sulfat turşusu ilə sadəcə əridiblər.