"Putin bunu etiraf etməkdən qorxur" | Müharibəyə hansı ölkə son qoya bilər?

“Çin müasir Rusiyanın tam asılı olduğu güclü dövlətdir. Pekin Moskvanı Ukraynaya qarşı müharibəni dayandırmağa məcbur edə bilər”.

Bu fikri Ukrayna Prezidenti Volodimir Zelenski Birləşmiş Millətlər Təşkilatının Təhlükəsizlik Şurasının iclasında çıxışı zamanı bildirib.

“Əgər Çin həqiqətən də bu müharibənin bitməsini istəsəydi, o, Moskvanı bu işğalı dayandırmağa məcbur edə bilərdi. Çinsiz Putin Rusiyası heç nədir, lakin Çin sülh naminə hərəkət etmək əvəzinə susmağı və kənarda qalmağı üstün tutur”, ‒ o vurğulayıb.

Dövlət başçısı əlavə edib ki, Rusiya lideri Putin Ukrayna və dünya qarşısında çıxış etməkdən qorxur. Bunun əvəzinə o, mühüm tədbirlərə qan tökülməsini dayandırmaq istəməyən və buna qadir olmayan nümayəndə heyətləri göndərir.

“Rusiya nümayəndəsi burada iştirak edir, lakin əlbəttə ki, bu, həqiqi qərarlar verən şəxs deyil. Bu adam Ukrayna və dünya ilə üz-üzə oturmaqdan və sadəcə müharibə istədiyini açıq şəkildə etiraf etməkdən qorxur”, ‒ Zelenski deyib.

Ukrayna liderinin sözlərinə görə, Putinin Pekində və ya başqa şəhərlərdə görünməsi yalnız diplomatiya axtardığı görüntüsü yaratmaq, qətllər üçün daha çox vaxt qazanmaq üçündür.