"Taxıl sazişi" ilə bağlı Ankaradan mühüm təklif

“Qara dəniz təşəbbüsü qlobal ərzaq böhranı ilə mübarizədə əsas rol oynadı. Bu, xüsusilə Afrikada taxıla daha çox ehtiyacı olanlar üçün nəfəs borusu oldu. Gündəmə gətirilən alternativ təkliflər Qara dəniz təşəbbüsü kimi davamlı, təhlükəsiz və tərəflər arasında əməkdaşlığa əsaslanan qalıcı bir model təklif edə bilmədi”.

Bunu Türkiyə Prezidenti Rəcəb Tayyib Ərdoğan həmkarı Vladimir Putinlə ikitərəfli görüşdən sonra deyib.

“Rusiyanın təşəbbüsün bərpası ilə bağlı gözləntiləri bütün tərəflərə yaxşı məlumdur. İnanırıq ki, təşəbbüs nöqsanların aradan qaldırılması ilə davam etdirilməlidir. İkitərəfli görüşümüz zamanı bu məsələ ilə bağlı fikirlərimizi çox səmimi olaraq dəyərli dostumla bölüşdüm.

Bu kontekstdə biz Birləşmiş Millətlər Təşkilatı ilə məsləhətləşmələr və əhəmiyyətli irəliləyişləri ehtiva edən yeni təkliflər paketi hazırladıq. Hesab edirəm ki, bu yeni proses vasitəsilə nəticə əldə etmək mümkündür. Türkiyə olaraq gözləntiləri qarşılayacaq bir həllə qısa zamanda çatacağımıza inanıram”, – Türkiyə Prezidenti əlavə edib.