Regionu qızğın savaş gözləyir? | Suriya lideri ABŞ-yə çağırış etdi!

“İsrail 2024-cü il dekabrın 8-dən əvvəlki status-kvoya qayıtmalıdır”.

Bunu Suriya Prezidenti Əhməd əş-Şaraa deyib.

“İsrail 8 dekabr 2024-cü il tarixli status-kvoya qayıtmalıdır və biz heç kimi təhdid etməyəcəyimizi artıq bəyan etmişik. Suriya hamı ilə bərabər məsafə saxlamaq istəyir. Suriyanın əvvəlki vəziyyətə qayıtması heç kimin xeyrinə deyil. İsraillə əldə edilən istənilən uğurlu razılaşma regionda sülhün yayılmasına kömək edəcək digər anlaşmalara yol açacaq”, – dövlət başçısı bildirib.

Daxili vəziyyətlə bağlı Əhməd əş-Şaraa qeyd edib ki, Suriyanın sabitliyi onun birliyi ilə bağlıdır və hər hansı parçalanma cəhdi təhlükəli münaqişələr yaradacaq:

“Suriyanın bölünməsi ilə bağlı istənilən məsələ ilk növbədə Suriyaya və qonşu ölkələrə, xüsusilə Türkiyə və İraqa zərər verir”.

Suriya lideri Dəməşqdə hakimiyyət dəyişikliyindən sonra 1 milyon insanın ölkəyə qayıtdığını açıqlayıb.

Kürd məsələsinə gəlincə, Əhməd əş-Şaraa hesab edir ki, ABŞ silahlı kürdlərin Suriya Ordusuna inteqrasiyasına kömək edə bilər.