Rəsmi Kopenhagen şübhələnir, Moskva isə inkar edir

Danimarka və Norveçdə hava limanlarının fəaliyyətinin qəfil dayandırılması beynəlxalq qalmaqala səbəb olub. Baku TV-nin xüsusi reportajında qeyd olunur ki, naməlum pilotsuz uçuş aparatlarının (dronların) uçuş zolaqları üzərində görünməsi Skandinaviyanın ən böyük hava limanlarında, o cümlədən Kopenhagendə reyslərin dörd saat ərzində tamamilə ləğv edilməsinə gətirib çıxarıb. Rəsmi Kopenhagen bu təxribatın arxasında Rusiyanın dayandığından şübhələnir və hadisəni hibrid müharibənin tərkib hissəsi kimi qiymətləndirir. Moskva isə bu ittihamları qəti şəkildə inkar edərək əsassız adlandırır. Materialda dron hücumlarının mülki aviasiyaya vurduğu ziyan, xüsusi xidmət orqanlarının araşdırmaları və Şimali Avropa ölkələrinin təhlükəsizlik tədbirlərini gücləndirməsi ətraflı təhlil olunur.