Rəsmi Tehranın terrorla bağlı reaksiyası necə olacaq? | Politoloqdan açıqlama

İsrailin Suriya paytaxtına endirdiyi və İran konsulluğuna aid binanın dağılması ilə nəticələnən hava zərbəsindən sonra aralarında briqada generalının da olduğu yeddi iranlı zabitlə yanaşı, ümumilikdə 13 nəfər həlak olub.

İran hücuma görə məsuliyyəti İsrail və ABŞ-nin daşıdığını bildirməklə dolayısı ilə hadisənin müharibəyə əsas yaratdığına işarə edib.

Lakin İranın buna bənzər hədələyici bəyanatlarının heç bir nəticəsini görmədiyimiz üçün rəsmi Tehranın bu dəfə hansı addım atacağı ilə bağlı bir sıra suallar yaranıb. Məsələn, 2020-ci ilin yanvarında ABŞ kəşfiyyatı tərəfindən Bağdad hava limanında SEPAH-ın quru qoşunlarının komandanı Qasım Süleymaninin öldürülməsi İran tərəfindən daha çox təhdid dolu reaksiyalarla yadda qaldı, nəinki adekvat cavab verməklə.

Bundan başqa, 2024-cü ilin yanvarında Suriyada fəaliyyət göstərən Qüds qüvvələri hərbi birləşməsinin briqada generalı və digər dörd nəfər SEPAH mənsubu İsrail hücumu nəticəsində həlak olsa da, İran yenə də adekvat addım atmayıb.

Maraqlıdır, rəsmi Tehranın budəfəki reaksiyası necə olacaq?

Politoloq Natiq Miri bildirib ki, İran yenə də birbaşa müharibəyə müdaxilə etməkdən çəkinəcək:

“İran ənənəvi olaraq özünün muzdlu proksi qüvvələrindən istifadə edərək HƏMAS, Livandakı “Hizbullah” və yaxud Suriyadakı milisləri tərəfindən İsrailə müəyyən raket zərbələri endirə bilər. Eyni zamanda İsrailin müxtəlif ölkələrdəki diplomatik nümayəndələri terror hücumuna məruz qala bilər”.