Rubinyan od püskürdü | “Ermənistana qarşı bunun edilməsinə imkan verməyəcəyik!”

“Robert Koçaryan, Serj Sarkisyan və II Qaregin – bütün “Daşnaksütyun” Ermənistanı Rusiyaya qurban vermək istəyir”.

Bunu Ermənistan parlamentinin sədr müavini Ruben Rubinyan Gümrü meri Vardan Qukasyanın Ermənistan-Rusiya münasibətləri ilə bağlı açıqlamalarını şərh edərkən deyib.

“Bu, R.Koçaryan və Serj Sarkisyan tərəfdarlarının, xroniki beyin zəifliyindən əziyyət çəkənlərin, Ktriç Nersisyan (II Qaregin) və ona müxtəlif yaxın adamların xəyal etdiyi Ermənistandır. Vardanik onların ümumiləşdirilmiş obrazıdır – gündə 10 dəfə Tanrının adından boş yerə istifadə edən oğru kommunist.

Onlar “Daşnaksütyun”un bədnam xəttinə uyğun olaraq Ermənistanın müstəqilliyini (Rusiyaya) qurban vermək istəyirlər. Buna imkan verməyəcəyik”, – vitse-spiker bildirib. Teleaparıcı Petros Qazaryan da rusiyapərəst Gümrü merinə təpki göstərib:

“Fikrimcə, Vardanik çoxlarının “təbii müttəfiqimizlə münasibətləri bərpa etmək və dərinləşdirmək” tezisi altında gizlədilmiş niyyətlərini səmimiyyətlə dilə gətirir. “Daşnaklar”, Sarkisyan, Koçaryan, Vanetsyan, katolikos, Karapetyan və bir çox başqaları həmin birliyi bərpa etmək istəyirlər. Bütün bunlar bizi qorxu içində saxlamaq və “İttifaq Dövləti”nə qoşulmağa haqq qazandırmaq üçün lazımdır”.

Qeyd edək ki, Vardan Qukasyan bundan əvvəl Ermənistanın bütün gücü ilə Rusiya ilə “İttifaq Dövləti”ində birləşməli olduğunu söyləmişdi:

“Bütün Avropa birləşdiyi kimi, Çin və Rusiya da ittifaq yaradır. Ermənistan nəyi gözləyir? Mən demirəm ki, biz Pyatiqorsk və ya Ulyanovsk vilayəti olaq, mən deyirəm ki, bütün gücümüzlə Rusiya ilə ittifaq yaratmalıyıq”.

Ermənistan Kommunist Partiyasının üzvü, rusiyayönümlü siyasətçi Vardan Qukasyan apreldə Gümrüdə keçirilən mer seçkilərində qalib gəlib.