Rusiya lazım olan hər şeyi edəcək | Rəsmi Moskvadan Suriya barədə təcili açıqlama

“Prezident Bəşər Əsəd Suriya ərazisində silahlı münaqişənin bir sıra iştirakçıları ilə apardığı danışıqlar nəticəsində prezident postunu tərk etmək qərarına gəlib və hakimiyyətin dinc yolla ötürülməsi barədə göstəriş verərək ölkəni tərk edib. Rusiya bu danışıqlarda iştirak etməyib”.

Bu barədə Rusiyanın Xarici İşlər Nazirliyindən bildirilib.

“Biz bütün tərəfləri zorakılıqdan əl çəkməyə və bütün idarəetmə məsələlərini siyasi vasitələrlə həll etməyə çağırırıq. Biz Suriya cəmiyyətindəki bütün etno-konfessional qüvvələrin fikirlərinə hörmət etməyə çağırırıq və yekdilliklə qəbul edilmiş Birləşmiş Millətlər Təşkilatı Təhlükəsizlik Şurasının 2254 saylı qətnaməsi əsasında inklüziv siyasi prosesin qurulması səylərini dəstəkləyirik. Həmçinin BMT-nin bu yanaşmaları nəzərə alacağını gözləyirik”, – deyə bəyanatda bildirilib.

Qeyd olunub ki, rəsmi Moskva Suriyada baş verən dramatik hadisələri narahatlıqla izləyir və Suriyadakı Rusiya vətəndaşlarının təhlükəsizliyini təmin etmək üçün bütün lazımi tədbirləri görür.

“Rusiyanın Suriyadakı hərbi bazaları yüksək hazırlıq vəziyyətinə gətirilib. Hazırda onların təhlükəsizliyinə ciddi təhdid yoxdur”, – deyə qurumun bəyanatında qeyd olunub.