Rusiya-Ukrayna müharibəsində gərginlik pik həddə | Hansı ərazilər uğrunda döyüş gedir?

Üç ilə yaxındır davam edən Rusiya-Ukrayna müharibəsində gərginlik pik həddə çatıb.

Ölkə demək olar ki, hər gün hava hücumlarına məruz qalır. Ən ağır vəziyyət hazırda Zaporojyenin cənub və Donetskin şərq vilayətlərində hökm sürür.

Ukrayna Silahlı Qüvvələrinin cənub cəbhəsi üzrə birləşmənin rəsmisi, polkovnik Vladislav Voloşin Baku TV-nin Şərqi Avropa bürosuna ölkədə baş verən son hadisələr barədə danışıb:

“Cənub istiqamətində hazırda vəziyyət kifayət qədər mürəkkəbdir, çünki qarşı tərəf mövqelərimizi və cəbhəyanı yaşayış məntəqələrini atəşə tutmağa davam edir. Rusiya Ordusu artilleriya və pilotsuz uçuş aparatlarından çox fəal istifadə edir. Hazırda Rusiya hərbçiləri Donetsk vilayətinin cənubunu nəzarət altına almağa cəhd edirlər.

Zaporojye və Xerson vilayətlərinin bir hissəsi artıq işğal olunub. Xerson, Zaporojye, Nikopol və Dneprin sağ sahilində yerləşən bütün şəhərlər daim atəş altındadır. Hazırda Rusiya Ordusu belə hücum əməliyyatlarının sayını artırmaq üçün piyada qüvvələrini toplayır və digər istiqamətlərdə irəliləməyə çalışır”.

Qeyd edək ki, Rusiyanın son günlərdə endirdiyi hava zərbələri nəticəsində Ukraynanın enerji infrastrukturuna ciddi ziyan dəyib.