Rusiya və İran zəiflədi, amma... | Tramp Ərdoğana heyranlığını belə ifadə etdi

ABŞ-nin yeni seçilmiş Prezidenti Donald Tramp Türkiyə Prezidenti Rəcəb Tayyib Ərdoğana heyranlığını ifadə edərək, onu dost və hörmət etdiyi insan adlandırıb.

Bu barədə Floridadakı Mar-a-Laqo malikanəsində keçirdiyi mətbuat konfransında deyib.

“Prezident Ərdoğan mənim dostumdur. Sevdiyim və hörmət etdiyim şəxsdir. Düşünürəm ki, o da mənə hörmət edir”, – o bildirib.

Tramp qeyd edib ki, ilk prezidentliyi dövründə Suriyada İŞİD-i məğlub edib və ABŞ qoşunlarının əksəriyyətini oradan çıxarıb.

Təxminən 2000 ABŞ əsgərinin Suriyadan çıxarılması ilə bağlı suala Tramp belə cavab verib:

“Bunu sizə deməyəcəyəm, çünki bu, hərbi strategiyanın bir hissəsidir, ancaq Türkiyənin olduğunu söyləyəcəyəm. Amma Suriya ilə bağlı baş verənlərə baxın, Rusiya zəiflədi, İran zəiflədi və o, çox ağıllı oğlandır. Öz adamlarını oraya müxtəlif formalarda, müxtəlif adlarla göndərdi, onlar da içəri girdilər və hakimiyyəti ələ keçirdilər”.