Rusiya Zaporojyeyə 600-dən çox zərbə endirib

Rusiya Ukraynanın Xarkov vilayətinə hücum edib. Son sutka ərzində baş verən hücumlar nəticəsində ən azı 2 nəfər həlak olub, təxminən 30 nəfər yaralanıb.

Bu barədə ölkənin Milli Polisi məlumat verib.

“Rusiya qoşunları dinc əhaliyə qarşı raketlər, idarəolunan aviasiya bombaları, müxtəlif növ pilotsuz təyyarələr tətbiq edib. Dağıntılar altından 3 yaşlı uşağın və 22 yaşlı qadının meyitləri çıxarılıb. Həmçinin 6 aylıq körpə də daxil olmaqla 30-a yaxın vətəndaş xəsarət alıb”, – deyə məlumatda bildirilib.

Qeyd olunub ki, daha 5 nəfərlə əlaqə saxlamaq mümkün deyil, onların axtarışları davam etdirilir. Polisin məlumatına əsasən, hücumlar nəticəsində 25 çoxmənzilli ev, xəstəxana binası, təhsil müəssisəsi, ticarət-ofis binası, eləcə də 33 avtomobil zədələnib.

Həmçinin Rusiya qoşunları son sutka ərzində Ukraynanın Zaporojye vilayətinin 23 yaşayış məntəqəsinə 600-dən çox zərbə endirib.

Vilayət Hərbi Administrasiyasının rəhbəri İvan Fyodorov bildirib ki, yaşayış evləri, avtomobillər və infrastruktur obyektlərinə dəymiş ziyanla bağlı 105 məlumat daxil olub. Rusiya qoşunlarının Nikolayevdə də gecə kritik infrastrukturlara hücum etdiyi bildirilib.