Rusiyanın yeni planı, məhdudiyyətlər başladı | Peskovdan Trampın hədələrinə reaksiya

Son zamanlar Rusiyada mobil internetin istifadəsində problemlər yaranıb.

Bir çox provayder və operatorlarda kütləvi problemlər yaşanır, amma hakimiyyət buna görə narahat deyil. Əksinə, bunun planlaşdırılmış tədbir olduğu bildirilir. Məhdudiyyətlər isə hələ bir müddət davam edəcək.

Bununla bağlı açıqlama verən Rusiya Prezidentinin mətbuat katibi Dmitri Peskov bildirib ki, ilk növbədə təhlükəsizliyi təmin etmək lazımdır:

“Mobil internetlə bağlı yaşanan problemlərin təhlükəsizlik, xüsusilə də vətəndaşların təhlükəsizliyi ilə bağlı olması doğrudur və bu məsələ prioritet olaraq qalır. Təhdidlər davam edir, təhlükə göz qabağındadır. Kiyev rejiminin mövqeyi aydındır və dəyişmir. Müvafiq tədbirlər görmək lazımdır”.

Əlavə olunub ki, ölkədə internetə qoyulan müvəqqəti məhdudiyyətlər Ukrayna tərəfindən atılan PUA-ların qarşısını almaq məqsədi güdür. Dmitri Peskov ABŞ Prezidenti Donald Trampın Rusiya Prezidenti Vladimir Putini Ukrayna ilə danışıqlar masasına oturmayacağı təqdirdə yeni, sərt sanksiyalarla hədələməsi mövzusuna da toxunub.

“Biz D.Trampın bəyanatlarını analiz etməkdə davam edirik. Əgər Prezident lazım bilərsə, bu məsələni şərh edəcək”, – deyə Kreml nümayəndəsi vurğulayıb.