Sandu yayılan iddialara belə cavab verdi | Dünyanı silkələyən xəbər

“Moldova Prezidenti Maya Sandu Dnestryanıda hərbi əməliyyat planı hazırlayır. Heç kim təminat verə bilməz ki, o, regionda real müharibəyə başlamağa cəhd etməyəcək”.

Bu barədə Rusiya mediası ölkənin Xarici Kəşfiyyat Xidmətinə istinadən məlumat yayıb.

İddiaya görə, M.Sandu ölkənin hökumət rəhbərliyi ilə enerji təhlükəsizliyi məsələləri üzrə görüş keçirib.

Görüş liderin Dnestryanı üzərində nəzarətin qurulması və Rusiyanın bölgədə sülhməramlı mövcudluğunun aradan qaldırılması üçün hərbi əməliyyat planının hazırlanması barədə sözləri ilə yekunlaşıb.

Lakin Moldovanın Prezident Administrasiyasından Dnestryanı bölgənin ələ keçirilməsi məqsədilə hərbi əməliyyatın başladılması ilə bağlı informasiya təkzib olunub.

Administrasiyanın rəhbəri Adrian Balutel “Telegram” kanalında yazıb ki, sözügedən məlumat regionda çaxnaşma və inamsızlıq yaratmaq üçün ortaya atılmış dezinformasiyadır.

“Bir daha bildiririk ki, Kişinyov istisnasız olaraq münaqişənin sülh yolu ilə həllinə sadiqdir. Həll üçün ən mühüm addım Rusiya qoşunlarının Moldova ərazisindən tam və qeyd-şərtsiz çıxarılmasıdır”, – deyə yazıda vurğulanıb.