Savaşın son statistikası: İsrail rəqibinin komandirlərini və 400 üzvünü qətlə yetirdi

İsrail Müdafiə Qüvvələri oktyabrın 24-dək olan son 24 saat ərzində HƏMAS qruplaşmasının 400-dən çox silahlı üzvünü vurub.

Eyni zamanda ordunun mətbuat xidməti hərəkatın bir neçə komandirinin öldürüldüyünü açıqlayıb.

“HƏMAS-ın hücum imkanlarının qarşısını almaq üçün keçirilən genişmiqyaslı əməliyyat zamanı İsrail Müdafiə Qüvvələri onlarla döyüşçüyə və hərəkatın dayaq nöqtələrinə zərbələr endirib”, – deyə məlumatda bildirilib.

Məlumatda o da qeyd olunub ki, ordu HƏMAS-ın qazdığı tunellərə də zərbələr endirib. Nəticədə Nuseyrat, Şati və Furqan batalyonlarının komandir müavinləri məhv edilib.

Münaqişənin fəsadları bununla yekunlaşmayıb. Tərəflərin qarşılıqlı zərbələri nəticəsində ölən və yaralananların sayı da artıb.

Yerli KİV-in verdiyi məlumata görə, oktyabrın 7-dən bəri münaqişə bölgəsində 306-sı əsgər olmaqla, azı 1 400 İsrail vətəndaşı həyatını itirib, 5 132 nəfər isə yaralanıb.

Həmçinin 2 055-i uşaq və 1119-u qadın olmaqla, azı 5 087 Fələstin vətəndaşı müharibənin qurbanı olub, daha 15 273 fələstinli isə yaralanıb.