Şəhərə idarəolunan aviabombalarla zərbələr endirildi

Rusiya Ukraynanın Xarkov vilayətinə idarəolunan aviabombalar ilə növbəti zərbələr endirib. Hücum nəticəsində bir nəfər ölüb, daha üç sakin yaralanıb.

Bu barədə “RBK-Ukrayna” Xarkovun meri İqor Terexovun “Telegram” kanalına istinadən məlumat yayıb.

Qeyd olunub ki, bomba şəhərin ən intensiv nəqliyyat axını olan yollarından birinə düşüb. Bu zaman içərisində insanlar olan bir neçə avtomobil yanmağa başlayıb.

“Hazırda bir nəfərin həlak olduğu, üç nəfərin yaralandığı məlumdur. Yaralılardan birinin vəziyyəti ağırdır. Zərbə yerinin yaxınlığında yerləşən çoxmənzilli və fərdi yaşayış evlərinə də ziyan dəyib”, – deyə şəhər rəhbəri bildirib.

Bu arada Rusiya Ukraynanın itkilərini yeniləyib. Rusiya Müdafiə Nazirliyinin rəsmi nümayəndəsi İqor Konaşenkovun sözlərinə görə, xüsusi əməliyyatın başladığı gündən indiyə qədər qarşı tərəfin 669 təyyarəsi, 283 helikopteri, 105 min 217 PUA-sı və 640 zenit-raket kompleksi məhv edilib. Bundan başqa, 26 min 728 tank və digər zirehli texnika, 1634 reaktiv yaylım atəş sistemi, həmçinin 32 min 185 artilleriya və minaatan sıradan çıxarılıb.