Strateji obyektlər dövlətin nəzarətinə keçdi

Suriya Ordusunun Fəratın qərbində irəliləməsi və bir neçə mühüm bölgəni geri alması nəticəsində bir sıra strateji obyekt dövlətin nəzarətinə keçib.

Bu barədə Suriyanın energetika naziri Məhəmməd əl-Bəşir məlumat verib.

Nazir müvafiq qurumların, əsasən neft yataqları və su nasos stansiyaları kimi mühüm obyektlərdə fəaliyyətin və xidmətlərin davamlılığını təmin etmək məqsədilə artıq işlərə başlandığını bildirib.

Suriya Ordusu həmçinin ölkənin şimalındakı Raqqa əyalətində əməliyyat keçirib. Əl-Tabqa hərbi aerodromu yaraqlılardan təmizlənib və PKK silahlıları ərazidən çıxarılıb. Bu barədə “Al-Ikhbariya” telekanalı əməliyyat komandanlığına istinadən məlumat yayıb.

Qeyd edək ki, bundan əvvəl əməliyyat komandanlığı ərazidəki PKK qüvvələrinin mühasirəyə alındığını açıqlamışdı.

Bu arada ABŞ Silahlı Qüvvələri Suriyada İŞİD-ə qarşı əməliyyat keçirib. Nəticədə, “Əl-Qaidə” terror təşkilatı ilə əlaqəsi olan, iki ABŞ hərbçisi və bir tərcüməçinin öldürülməsində məsuliyyət daşıyan terrorçu ilə birbaşa təmasda olan İŞİD lideri məhv edilib.