Suriyada rejimin süqutundan sonra Bəşər Əsədin xaricdəki aktivlərinin axtarışı başladı

Suriyada Bəşər Əsəd rejiminin süqutundan sonra onun ailəsinin və qohumlarının xaricdəki aktivlərinin axtarışı başlayıb.

Əsəd ailəsinin aktivlərinin dəyərinin 12 milyard dollar olduğu bildirilir. Bu rəqəm “The Wall Street Journal” tərəfindən açıqlanıb.

Qeyd olunur ki, aktivlər arasında İsveçrə banklarında hesablar, Dubayda daşınmaz əmlak, Vyanadakı biznes var.

Məlumata görə, Suriyanın keçmiş lideri mərhum atası Hafiz Əsədlə birlikdə kapitalı xaricdə gizlətmək üçün qohumlarından istifadə edib. İddia olunur ki, Bəşər Əsədin həyat yoldaşı, anası və əmisinin adına olan xarici aktivləri üzə çıxarmaq mümkün olub.

Ağ Evin keçmiş rəsmisi Endryu Tablerin sözlərinə görə, inqilabdan əvvəl onların pulları yumaq üçün kifayət qədər vaxtları olub.

“Onların həmişə B planı var idi və indi deportasiyaya yaxşı hazırlaşıblar”, – deyə Endryu Tabler bildirib.