Tailandda güclü zəlzələnin nəticələri | Hava limanına uçuşlar qadağan edildi

Myanmanın mərkəzi hissəsində yerləşən Taunqu şəhərində məktəb binasının uçması nəticəsində dağıntılar altında qalan 20 uşaqdan 5-i həlak olub. Digər uşaqların axtarışı davam etdirilir. Zəlzələ nəticəsində baş verən uçqunlarda azı 20 nəfər həlak olub.

Xarici medianın məlumatına görə, 6 regionda fövqəladə vəziyyət elan edilib.

Bundan əlavə, yerli hökumət zəlzələnin nəticələri ilə mübarizə üçün beynəlxalq ictimaiyyətdən kömək istəyib.

Banqkokda isə güclü təkanlar nəticəsində azı 3 nəfər ölüb. 300-dən çox şəxsin yaralandığı bildirilir.

Qeyd edək ki, göydələnin uçması nəticəsində 90 nəfər itkin düşüb. Xilasedicilər dağıntılar altında qalan 7 fəhləni xilas etməyə nail olublar.

Təhlükəsizlik məqsədilə Tailandda məktəblər bağlanıb. Yeraltı təkanlar səbəbindən ölkənin bütün hava limanlarına uçuşlar qadağan edilib.

Xatırladaq ki, martın 28-də Myanmada 7,7 bal gücündə zəlzələ baş verib. Cəmi bir neçə dəqiqə sonra 6,4 bal gücündə daha bir təkan baş tutub. Təbiət hadisəsi Tailandın paytaxtı Banqkokda, Banqladeş, Hindistan, Laos və Çində də hiss olunub.