Tokayev çevriliş cəhdində Nazarbayevi günahlandırdı

“Qazaxıstanda həqiqətən də ikili hakimiyyət modelinin tətbiqi cəhdləri olub və deməliyəm ki, bu cəhdlər məqsədyönlülüyü və mütəşəkkil şəkildə təşkil edilib”.

Bunu Qazaxıstan Prezidenti Kasım-Jomart Tokayev “Egemen Qazaqstan” qəzetinə müsahibəsində 2022-ci ildə ölkədəki çevriliş cəhdlərini şərh edərkən deyib.

“Mövcud siyasi vəziyyətdən istifadə edən siyasi manipulyatorlar bir növ paralel güc mərkəzi formalaşdırıblar. Bu güc mərkəzləri ölkəmizin Prezidenti, Ali Baş Komandanı və eks-prezidentin təmsil etdiyi Təhlükəsizlik Şurasının sədri olub. Bu da son nəticədə güc toqquşmasına gətirib çıxarmaya bilməzdi.

Daha artığını deyəcəyəm. Bu vəziyyət yanvar böhranı üçün ilkin şərtlərdən birinə çevrildi. Çünki sui-qəsdçilər ixtira edilmiş ikili hakimiyyətdən öz xeyirlərinə istifadə etməyə çalışırdılar. Yəqin ki, bir sıra məmurların, o cümlədən keçmiş ədliyyə nazirinin Elbaşının statusunun prezidentdən yüksək olması ilə bağlı açıqlamalarını xatırlayırsınız. Bəzi məmurlar bu kabinetdən o kabinetə qaçırdılar, ikibaşlı oyun oynayırdılar, həm də çox təhlükəli bir oyun. Sonralar mən birbaşa Nursultan Abişeviç Nazarbayevə dedim ki, ilk növbədə onun ən yaxın adamlarının siyasi oyunları az qala ölkəni parçalayır.

Hesab edirəm ki, bu, gələcək nəsil rəhbərlər üçün ciddi dərsdir. Onlar belə şeylərdən çəkinməli, həmişə yalnız dövlətin mənafeyini, cəmiyyətin rifahını düşünməlidirlər.

Təəssüflər olsun ki, daxili siyasi böhranın həlledici məqamlarında əsas hüquq-mühafizə orqanlarının rəhbərləri öz qeyri-peşəkarlıqlarını və hətta deyərdim, xəyanətlərini nümayiş etdirdilər”, – Qazaxıstan Prezidenti qeyd edib.