Tramp Ukrayna ilə bağlı danışıqların detallarını açıqladı - Baku TV

“Avropa liderləri ilə əsasən Rusiya və Ukrayna arasında hələ də davam edən müharibəyə aid müsbət danışıqlarımız baş tutdu. Bundan əvvəl komandalarımız müvafiq görüşlər keçiriblər. Amerikalı nümayəndələrin müharibənin bütün təfərrüatlarını eşitməsi çox vacib idi. Əgər bu görüşlər daha əvvəl baş tutsaydı, Rusiya-Ukrayna müharibəsində daha böyük irəliləyiş olardı”.

Bunu ABŞ Prezidenti Donald Tramp Ağ Evdə jurnalistlərə açıqlamasında bildirib.

“Birlikdə çox yaxşı işlədiyimiz üçün minnətdaram. Mənim fikrimcə, işimizə kömək olmayan bəzi məsələlər var. Bunları yeni sənədlərə daxil etmək lazım deyil. ABŞ-nin ərazi məsələsində Rusiya ilə mövqeləri fərqlidir. Bu etiraf edilməli və açıq şəkildə müzakirə olunmalıdır. İnanıram ki, vasitəçi kimi çıxış edən Amerika tərəfi kompromis tapmağa çalışmaq üçün müxtəlif addımlar təklif edəcək”, – D.Tramp deyib.

O qeyd edib ki, təhlükəsizlik zəmanətləri, ərazi məsələsi və Ukraynanın yenidən qurulması üçün kompensasiya ilə bağlı suallara cavab tapmaq üçün əllərindən gələni edəcəklər. ABŞ Prezidenti təhlükəsizlik zəmanətləri mövzusuna toxunaraq vurğulayıb ki, döyüş meydanında nə baş verəcəksə, həm hərbçilər, həm də mülki əhali baş verənləri aydın şəkildə bilməlidir.

Bu, çox vacibdir. D.Tramp bildirib ki, Ukrayna münaqişəsində nizamlanma sülhə heç vaxt olmadığı qədər yaxındır:

“Bu yolda məqsədlərimizə yaxınlaşırıq. Eyni zamanda avropalı liderlərdən dəstək görürük, onlar da müharibəyə son qoymaq istəyirlər. Maraqlısı isə odur ki, hazırda Rusiya da bunu istəyir. Ona görə də hər iki tərəfi tez bir zamanda bir araya gətirib ortaq məxrəcə gəlmək lazımdır. Düşünürəm ki, biz düzgün yolda irəliləyirik”.

Təhlükəsizlik zəmanətləri ilə bağlı D.Tramp onu da vurğulayıb ki, ABŞ Avropa ilə bu məsələ üzərində işləyir. Avropa bu məsələdə əsas rol oynayacaq və müharibənin qarşısını almaq üçün təhlükəsizlik zəmanətləri üzərində işlənilir.