Türkiyə və İranın xarici işlər nazirindən Yaxın Şərq mesajı

“İsrail-HƏMAS münaqişəsinin regional müharibəyə çevrilməsinin qarşısını almalıyıq”.

Bunu Ankarada Türkiyənin xarici işlər naziri Hakan Fidan iranlı həmkarı Hüseyn Əmir Abdullahianla birlikdə keçirdiyi mətbuat konfransında deyib.

"Türkiyə atəşkəsin təmin edilməsi, beynəlxalq sülh konfransının təşkil edilməsinə dair səylər göstərir və qarant ölkələrdən biri olmağa hazırdır", – Hakan Fidan qeyd edib. İranın xarici işlər naziri Hüseyn Əmir Abdullahian isə “Yaxın Şərqdə müharibə tezliklə başa çatmasa, idarəolunmaz vəziyyət yaranacaq”, – deyə çıxış edib.

"Bu müharibə cinayətlərini törədən İsrail bütün qadağan olunmuş silahlardan istifadə edir. Xəstəxanada baş verən partlayışı yadımıza salsaq, orada yaşanan partlayışlar, bombardmanlar, verilən şəhidlər, ölən və xəsarət alanların hər biri müharibə cinayətlərinin bariz nümunəsidir.

İran İslam Respublikası bölgədə müharibənin dayandırılması və genişlənməməsi üçün bütün müttəfiqləri ilə sıx dialoq halındadır", – Hüseyn Əmir Abdullahian vurğulayıb.

İranlı nazir həmçinin müharibənin dayandırılması üçün çağırış edən Türkiyəyə də təşəkkür edib.