Ukrayna kapitulyasiyaya imza atacaq? | Kiyev sakinləri son baş verənlərdən danışdı

Ukraynada hazırda ən aktual mövzulardan biri yeni səfərbərlik dalğasıdır.

Ordu veteranı, tanınmış vəkil Masi Nayemin “Ukrayna iki ay ərzində 160 min insanı səfərbər etməsə, kapitulyasiyaya imza atmalı olacaq” açıqlaması vəziyyəti daha da gərginləşdirib.

Ukrayna Ali Radasının Müdafiə və təhlükəsizlik komitəsinin sədri Fedor Venislavski Baku TV-yə bildirib ki, mövcud vəziyyətə baxmayaraq, səfərbərliklə bağlı qanunvericilik sənədində yenilik gözlənilmir.

“Ukrayna parlamenti səfərbərliyin təkmilləşdirilməsi ilə bağlı qanun layihəsi qəbul edib. Bu qanun yaxşı effekt verib. Düşünürəm ki, indi məsələ hərbi rəhbərliyin səlahiyyətindədir. Onlar parlamentin verdiyi imkanlardan istifadə edərək lazımi qədər şəxsi heyət səfərbər edə bilərlər. İlin sonuna qədər 160 000 nəfərin səfərbər olunması məlumatı inanmıram ki, həqiqəti əks etdirsin. Şübhəsiz ki, proses intensiv xarakter daşıyacaq, lakin hansısa kəskin dəyişikliklər barədə danışmaq hələ tezdir. Biz məlum qanunu qəbul edərkən ölkənin hərbi rəhbərliyinin bütün istəklərini nəzərə almışıq”, – o qeyd edib.

Ukrayna Silahlı Qüvvələrinin Quru Qoşunlarının Ehtiyatçılar Şurasının sədri İvan Timoçko isə bildirib ki, əslində problemin kökü başqa yerdədir:

“Bu qədər insanı səfərbər etmək üçün ordunun silahlanması və təchiz edilməsi mütləqdir. Maddi-texniki təchizatın yükünü artırmaq lazımdır ki, burada kompleks tədbirlər həyata keçirilsin. Ukraynada əhalinin ümumi hazırlığını, ibtidai və peşə hərbi hazırlığını aparmaq lazımdır. Çatışmayan cəhətimiz budur”.