Ukrayna Kurska yenidən zərbələr endirib | Rusiyada dəmir yolu stansiyası vuruldu - Baku TV

Ukrayna Silahlı Qüvvələri Kursk bölgəsindəki dəmir yolu stansiyasına zərbə endirib.

Bu barədə bölgənin qubernatoru Aleksandr Xinşteyn özünün “Telegram” kanalında məlumat verib.

Onun sözlərinə görə, zərbə alan stansiya Lqov şəhərində olub. Dörd dəmir yolu işçisi yaralanıb, onlardan biri xəstəxanaya aparılıb.

A.Xinşteyn qeyd edib ki, stansiya nəqliyyatın hərəkəti üçün bağlanıb, ona görə də orada sərnişin olmayıb.

“Hücum baş verən anda bələdiyyə administrasiyasının maşını stansiya binasına yaxınlaşıb. Maşın zədələnib, amma xoşbəxtlikdən xəsarət alan olmayıb”, – deyə o əlavə edib.

Bu arada, Rusiya müharibənin 1608-ci günü üçün Ukrayna Ordusunun itkiləri barədə məlumatı yeniləyib. Müdafiə Nazirliyinin rəsmi nümayəndəsi İqor Konaşenkovun sözlərinə görə, xüsusi əməliyyatın başladığı gündən indiyə qədər qarşı tərəfin 673 təyyarəsi, 284 helikopteri, 185 525 PUA-sı, 666 zenit-raket kompleksi, 30 222 tank və digər zirehli texnikası sıradan çıxarılıb. Bundan başqa, 1761 reaktiv yaylım atəş sistemi, 35 829 artilleriya və minaatanı, 66 970 xüsusi hərbi avtomobil texnikası məhv edilib.