Ukrayna Nijni Novqorodda enerji infrastrukturunu hədəf alıb

Rusiya pilotsuz təyyarələri Ukraynanın Dnepr şəhərinə kütləvi hücum edib. Nəticədə iki nəfər ölüb, daha səkkiz insan yaralanıb.

Dnepropetrovsk Vilayət Hərbi Administrasiyasının rəhbəri Aleksandr Qanja "Telegram" kanalında məlumat verib ki, yaralananlar arasında azı iki uşaq var.

"Bir nəfərlə hələ də əlaqəyə saxlaya bilmirik", – deyə aministrasiya rəhbəri qeyd edib.

Onun sözlərinə görə, gecə ərzində vilayət səmasında Rusiyanın 40 PUA-sı məhv edilib.

Ukraynanın müdafiə qüvvələri isə aprelin 23-nə keçən gecə Samarada neft emalı zavoduna və Nijni Novqorod vilayətindəki "Qorki" nasos-kompressor stansiyasına zərbələr endirib.

Bu barədə ölkənin Dezinformasiyaya Qarşı Mübarizə Mərkəzinin rəhbəri Andrey Kovalenko məlumat verib. Sənaye müəssisələrinə zərbə nəticəsində xəsarət alanlar var. Bir nəfər həlak olub.

Qeyd edək ki, Avropa İttifaqı üzv dövlətləri Ukraynanın Macarıstan və Slovakiyaya "Drujba" neft kəməri vasitəsilə Rusiya neftinin nəqlini bərpa etməsindən sonra Kiyev üçün təcili ehtiyac duyulan 90 milyard avro kreditin açılması və Moskvaya qarşı yeni sanksiyalar paketi barədə razılığa gəliblər. Bu, Budapeştin veto hüququnu ləğv etməsinə səbəb olub.