Ukrayna orduya nə qədər büdcə ayırdı? | Ölkənin əsas planları açıqlandı

İstənilən halda Ukrayna NATO yolundan dönməyəcək və bu, xalqın indiki halda yenilənmiş qərarıdır.

Bu fikri Kiyevdə baş tutan Ukrayna hökumətinin yeni fəaliyyət proqramlarının təqdimatında ölkənin parlament sədri Ruslan Stefançuk səsləndirib.

“Ukrayna üçün NATO-ya üzvlük, Alyansa uyğunluq daxili çağırış məsələsidir. Bu yolda irəliləməyə davam edəcəyik. Qanunvericilik aktları vasitəsilə bu barədə çoxdan qərar vermişik. Ukrayna parlamenti NATO yolunda strategiyanı həyata keçirməyə davam edəcək. Bu, geriyə yolu olmayan bir prosesdir.

Ukraynanın inkişafının birinci və əsas vektoru Avropaya inteqrasiya olaraq qalır. Bu, sadəcə olaraq, Avropa İttifaqı bayrağı olan qanunların siyahısı deyil. Bunlar bizim etməli olduğumuz məzmunlar və islahatlardır. Bu bizim həyat yolumuzdur”, ‒ deyə o bildirib.

Ukraynanın Baş naziri Yuliya Sviridenko isə müharibə ilə bağlı ölkəsinin yeni büdcəsini açıqlayıb:

“Ukrayna hökuməti növbəti ardıcıl 2 ilin büdcəsinin 50 %-dən az olmayan hissəsini ordusunu silahlandırmağa planlaşdırıb. Hökumətin prioritetləri bunlardır: müdafiə və təhlükəsizlik, Avropaya inteqrasiya, antikorrupsiya tədbirləri. Təkcə 2026-cı il üçün müharibəyə ayrılan büdcə 120 milyard ABŞ dolları olacaq. Bu rəqəm Ukrayna büdcəsindən ayrılanlar, tərəfdaşlarımızın yardımları ilə birlikdə hesablanıb. Bundan əlavə, 2026-2027-ci illər üçün 37 milyard dollar makromaliyyə yardımının cəlb edilməsi də planlaşdırılır”.