Ukrayna Rusiya Ordusunu necə şoka saldı? - Ağır itkilərin səbəbi üzə çıxdı

“Rusiya Ordusu Ukraynanın müdafiə xəttini yarmağa çalışır və zəif nöqtələr axtarır. Amma bu onlara əvvəlkindən daha baha başa gəlir”.

Bu sözlər “The Economist”də yayılan məqalədə yer alıb.

Bildirilib ki, Ukraynanın Silahlı Qüvvələri dron istehsalını artırmaqla daha çox Rusiya hərbçisini öldürə bilir.

Ukrayna Ordusunun 93-cü briqadasının komandiri Yeqor Derevyanko nəşrə açıqlamasında qeyd edib ki, Rusiya Ordusu Konstantinovka və Pokrovsk istiqamətində hücuma hazırlaşır.

“İyulda dronların köməyi ilə Rusiya bayrağı cəbhədə 5 dəfə endirilib. Yəni onların ələ keçirdiyi mövqelər azad olunub. Rusiya tərəfi isə yalandan məlumat yayır ki, guya hansısa kəndi tutublar”, – deyə Y.Derevyanko əlavə edib.

Briqada komandirinin sözlərinə görə, rusiyalı hərbçilər hücum əməliyyatlarının intihara bərabər olduğunu bilirlər.

“Onlar cəbhə xəttində irəliləyirlər, amma həmin əraziyə əlavə qüvvə göndərməli olurlar, çünki ilk hücumu həyata keçirənlər Ukrayna dronları vasitəsilə öldürülür. Müasir texnologiya ilə əvvəllər 50 rus hərbçini öldürə bilirdiksə, hazırda bu imkanımız 5 dəfə artıb”, – deyən komandir etiraf edib ki, Rusiyanın dron hücumları da təhlükəlidir.

Qeyd edək ki, ABŞ Prezidenti Donald Tramp Ukraynaya 155 millimetrlik mərmilər göndərəcək. Bu isə Rusiyaya qarşı hücumları daha da effektiv səviyyəyə çatdıra bilər.