Ukrayna Rusiyanın bu ərazisini bombaladı | Müharibədə son vəziyyət

Ukrayna Silahlı Qüvvələri pilotsuz uçuş aparatları ilə Rusiyanın Belqorod vilayətinə zərbələr endirib. Bu barədə yerli media məlumat yayıb.

Bildirilib ki, nəticədə azı 6 dinc sakin həlak olub, 35 nəfər yaralanıb. Məlumata görə, xəsarət alanlardan ikisi uşaqdır. Yaralılar xəstəxanaya yerləşdirilib.

Bölgənin qubernatoru Vyaçeslav Qladkov da hücumun təfərrüatları barədə danışıb. Onun sözlərinə görə, dünyasını dəyişənlər donuzçuluq kompleksinin işçiləri olub.

V.Qladkov bildirib ki, hadisə Borisov rayonunun Berezovka kəndi yaxınlığında baş verib. O həmçinin qeyd edib ki, Belqoroda hücum faktını Rusiya İstintaq Komitəsi araşdıracaq.

Bu arada, Ukrayna Baş Kəşfiyyat İdarəsi “Magura V5” dronları vasitəsilə Krım adasında Rusiyanın “Serna” tipli desant katerini də vurub.

Yerli medianın məlumatına görə, hadisə mayın 6-da gecə saatlarında Qara dənizdəki Uzkaya buxtasında baş verib.

Vurğulanıb ki, Rusiya İlan adasına hərbi texnika və desant daşımaq üçün həmin katerdən istifadə edib.