Ukrayna Sülh sammitində hansı ölkələrlə razılaşdı? | Zelenskidən anons

Ukrayna Prezidenti Volodimir Zelenski 15-16 iyun tarixlərində İsveçrədə keçirilən sülh sammiti zamanı 2-ci belə tədbirin anonsunu verib.

Onun sözlərinə görə, hər iki sammitin sonunda Rusiya-Ukrayna cəbhəsində müharibə sonlanacaq.

“Bu gün ümumilikdə 101 ölkə və bir sıra beynəlxalq təşkilatlar Ukrayna və onun tərəfdaşlarının qələbəsi üçün bir yerə toplaşıb. Bizim məqsədimiz isə bütün dünya ölkələrini bu şərəfli işə cəlb etməkdir. Bizim artıq Fransa, Çex Respublikası, Türkiyə, Keniya, Səudiyyə Ərəbistanı, ABŞ, Norveç, Polşa, Kanada, Qətər, Çili, Qana, Finlandiya, Niderland, Almaniya, Birləşmiş Krallıq kimi ölkələrlə ilkin razılaşmalarımız var. Biz bütün dövlətləri BMT Nizamnaməsinin əsas şərtlərindən biri olan birgə əməkdaşlığın edilməsinə və öz ideya və təkliflərini irəli sürməyə dəvət edirik. Əminəm ki, biz bu nəticəni birlikdə əldə edəcəyik.

Birinci və ikinci sülh sammitləri sülhün təfərrüatları üzrə gördüyümüz işi birləşdirməlidir. Sülhə doğru addımlamaq üçün sürətli hərəkət etmək lazımdır. Sülh üçün nəzərdə tutulan planlar hazır olduqda və hər bir addım bir-bir işlənib hazırlandıqda, ikinci sülh sammitinə yol açılacaq. Beləliklə, ədalətli və davamlı sülh təmin olunacaq. Biz artıq 2-ci sülh sammitinə ev sahibliyi edəcək ölkələrlə danışıqlara başlamışıq. Mən əminəm ki, edəcəyimiz seçim həqiqətən qlobal əhəmiyyət kəsb edəcək”, – deyə o bildirib.

Məlumat üçün bildirək ki, sözügedən konfransda Ukraynanın təqdim etdiyi yekun sənəd 78 ölkə tərəfindən təsdiqlənib. Sənəddə Zaporojye Atom Elektrik Stansiyasının Kiyevə verilməsi məsələsi öz əksini tapıb. Buna qarşı çıxan dövlətlər isə Ermənistan, Bəhreyn, Braziliya, Vatikan, İraq, Hindistan, İndoneziya, İordaniya, Kolumbiya, Liviya, Meksika, Birləşmiş Ərəb Əmirlikləri, Səudiyyə Ərəbistanı, Tayland və Cənubi Afrika Respublikası olub.