Ukraynadan Rusiyaya cavab atəşi | Müharibədə gərgin vəziyyət

Avqustun 4-dən 5-nə keçən gecə Rusiya Silahlı Qüvvələri “İskəndər-M” ballistik raketi və 46 “Şahed” tipli PUA ilə Ukrayna ərazilərini atəşə tutub.

Ukrayna Hava Hücumundan Müdafiə Qüvvələrindən bildirilib ki, PUA-lardan 29-u havada zərərsizləşdirilib, 17 pilotsuz təyyarə və bir raket isə hədəfinə çatıb.

Xarkov Vilayət Administrasiyasından bildirilib ki, düşmən gecə ərzində Xarkova da raket və dronlarla hücum edib. Yaşayış evlərinə, çoxmərtəbəli binalara, enerji obyektlərinə ziyan dəyib. Şəhərdə yanğınlar baş verib. Gecə saat 03:00 radələrində isə Lozova şəhərində dəmir yolu infrastrukturuna kütləvi atəş açılıb.

Xarkov Vilayət Prokurorluğundan vurğulanıb ki, hadisə nəticəsində 1 dəmir yolu əməkdaşı həlak olub, uşaqlar da daxil olmaqla 10 nəfər yaralanıb.

Ukrayna mətbuatında qeyd olunub ki, silahlı qüvvələr cavab atəşi olaraq Rostov vilayətində PUA ilə “Tatsinskaya” dəmir yolunu vurub. Nəticədə, yanğın baş verib.

Rostov vilayətinin qubernatoru Yuri Slyusar “Telegram” kanalında paylaşım edərək məlumatı təsdiqləyib. Əlavə edib ki, Ukraynanın hücumu nəticəsində Millerovski rayonunda da 500 kvadratmetr ərazidə yanğın baş verib. Zərərçəkənin olmadığı vurğulanıb.

Rusiya Müdafiə Nazirliyindən bildirilib ki, Hava Hücumundan Müdafiə Qüvvələri gecə ərzində Ukraynaya məxsus təyyarə tipli 24 PUA-nı zərərsizləşdirib. Onlardan əksəriyyəti Bryansk, Rostov, Kalujsk, Smolensk vilayətlərində vurulub.