Ukraynanın Xerson şəhəri hücuma məruz qaldı

Ukrayna Silahlı Qüvvələri “Neptun” raketləri ilə Rusiyanın Taqanroq şəhərində yerləşən və ordu üçün pilotsuz uçuş aparatları istehsal edən “Atlant Aero” zavoduna zərbə endirib. Nəticədə müəssisə ərazisində yanğın baş verib.

Bu barədə Ukrayna Hərbi Dəniz Qüvvələri məlumat yayıb və fotolar paylaşıb.

Rostov vilayətinin qubernatoru Yuri Slyusar hücum faktını təsdiqləyib. Lakin o bildirib ki, kommersiya infrastrukturu zərər görüb və anbar sahəsində yanğın baş verib.

Qeyd edək ki, adıçəkilən zavodda əvvəllər müxtəlif markalı minik və yük avtomobilləri istehsal olunurdu, lakin son dövrlərdə maliyyə problemləri səbəbindən ərazidə Rusiya Ordusu üçün dronlar istehsal edilirdi. Burada “Molniya” tipli zərbə-raket dronları, eləcə də “Orion” pilotsuz aparatının komponentləri hazırlanır.

Vurğulanıb ki, bu obyektin məhv edilməsi Rusiyanın dron istehsal imkanlarını azaldacaq və rus ordusunun Ukraynadakı mülki hədəflərə zərbə endirmək qabiliyyətini zəiflədəcək.

Ukraynanın isə Xerson şəhərinə hücum edilib. Dron zərbələri nəticəsində bir nəfər həlak olub, iki nəfər xəsarət alıb. “Mürəkkəb təhlükəsizlik vəziyyətinə baxmayaraq, xilasedicilər həlak olan sürücünün meyitini çıxarıblar”, – deyə məlumatda bildirilib.