Vardan Qukasyanın həbs edilmə səbəbi üzə çıxdı | Deportasiya oluna bilər?

Ermənistanın “Demokratiya, qanun və nizam-intizam”partiyasının qurucusu və keçmiş sədri Vardan Qukasyan ABŞ-nin Miqrasiya və Gömrük Xidməti əməkdaşları tərəfindən Las-Veqasda saxlanılıb və hazırda həbsdədir.

Bu barədə Ermənistan mətbuatında məlumat verilib. Bildirilib ki, onu deportasiya gözləyir.

28 fevralda V.Qukasyanın partiyası bəyanat yayaraq onunla 21 fevraldan etibarən əlaqənin kəsildiyini qeyd edib. V.Qukasyanın tərəfdarları ABŞ səfirliyi qarşısında etiraz aksiyası keçirməyi və onun taleyinə aydınlıq gətirilməsini tələb etməyi planlaşdırıb. Daha sonra V.Qukasyanın ürək problemləri səbəbindən ağır vəziyyətdə xəstəxanaya yerləşdirildiyi barədə şayiələr yayılıb.

ABŞ immiqrasiya xidmətinin məlumatına görə, 47 yaşlı V.Qukasyan 19 fevral 2022-ci ildə ABŞ-yə gedib, lakin müəyyən edilən müddətdə ölkəni tərk etməyib. Buna görə də onun immiqrasiya statusu ilə bağlı rəsmi prosedur başladılıb.

Qeyd edək ki, bundan əvvəl Demokratiya, qanun və nizam-intizam partiyası bəyanat yayaraq V.Qukasyanın ABŞ hakimiyyətinin nəzarətində olduğunu, lakin hələ həbs edilmədiyini iddia edib.