Gümrünün meri və memarı saxlanıldı

Gümrünün meri Vardan Qukasyan və 7 nəfər saxlanılıb. Onlar rüşvət almaqda ittiham olunurlar. Onların saxlanılması etirazla qarşılanıb.

Buna görə də Ermənistanın Daxili İşlər Nazirliyi müxalifətçi merin saxlanılmasına etiraz edənlərə qarşı cinayət işinin açılması ilə bağlı xəbərdarlıq edib. İnsanlara çağırış edilib ki, istintaqa mane olmasınlar.

Merin mətbuat katibi Lilit Aqekyan jurnalistlərə açıqlamasında bildirib ki, meriyanın bütün texnikası və sürücülər cərimə meydançasına aparılıblar.

Məlumata görə, Vardan Qukasyan və meriyanın memarı 1500 kvadratmetr ərazidə qanunsuz tikililəri sökməmək barədə razılaşıblar. Buna görə sahibkardan 10 min dollar pul alınıb. Həmin sahibkar “Fabrika” mağazalar şəbəkəsinin sahibi Sevak Qomtsyandır.

Xatırladaq ki, oktyabrın 1-də Ermənistanın Baş naziri Nikol Paşinyan parlamentdə hökumət saatı zamanı Qukasyanın səsverməni pul hesabına qazandığını bildirib. Onun mer seçilməsini anlaşılmazlıq adlandıran Paşinyan vəziyyəti düzəldəcəyini bəyan edib.