Vaşinqton Kiyevə vaxt qoydu | Sülh planı üçün geri sayım başladı?

ABŞ öz sülh planının şərtlərinə razılıq verməsi üçün Ukraynanı kəşfiyyat məlumatlarının mübadiləsini və silah tədarükünü azaltmaqla hədələyib.

“Reuters” agentliyinin yazdığına görə, Vaşinqton hazırda Kiyevə əvvəlki sülh danışıqlarında olduğundan daha güclü təzyiq göstərir və gələn cümə axşamına qədər çərçivə sənədini imzalamağı tələb edir.

Bu arada Ukrayna Prezidenti Volodimir Zelenski xalqa müraciət edib. O, Ukraynaya xəyanət etmədiklərini və bundan sonra da etməyəcəklərini bildirib.

V.Zelenskinin sözlərinə görə, Ukrayna gələn həftə ya ləyaqətini, ya da əsas tərəfdaşını itirmək riski ilə üzləşə bilər:

“İndi tariximizin ən çətin anlarından biridir. Ya 28 bəndlik sənədi qəbul etməliyik, ya da son dərəcə çətin qışa hazır olmalıyıq. Onlar bizdən cavab gözləyirlər, amma mən bunu 2019-cu il mayın 20-də Ukraynanın suverenliyini və müstəqilliyini müdafiə etməyə sadiq olduğumu deyəndə verdim”.

Yeri gəlmişkən Ukrayna Prezidenti V.Zelenski müharibənin başa çatdırılması ilə bağlı danışıqların fəallaşması fonunda ABŞ-nin vitse-prezidenti Cey Di Venslə telefon danışığı aparıb.

“Biz Amerika və bütün tərəfdaşlarla rahat şəkildə işləyəcəyik. İnandıracağam, alternativlər təklif edəcəyəm, amma şübhəsiz ki, düşmənə Ukraynanın sülh istəmədiyini söyləmək üçün heç bir səbəb verməyəcəyik”, – deyə V.Zelenski vurğulayıb.