Venesuela Prezidentinin tərəfdarları Ağ Ev ilə əlaqə saxlayıblar?

Venesuela Prezidenti Nikolas Maduro əvvəlki qeyri-rəsmi danışıqlar zamanı ABŞ tərəfi ilə görüşdə istefaya getməyə hazır olduğunu, lakin bunu ən azı 18 ay sonra edəcəyini bildirib.

Bu barədə danışıqların gedişatından xəbərdar olan mənbə CNN telekanalına bildirib.

Qeyd olunur ki, bəzi ABŞ rəsmiləri N.Maduronun istefasını problemin həlli kimi görürdülər. Lakin Ağ Ev yalnız Venesuela liderinin dərhal istefasını nəzərdə tutan planı dəstəkləmək qərarına gəlib.

Bəzi administrasiya nümayəndələri bildiriblər ki, N.Maduro və onun tərəfdaşları Ağ Evlə bir neçə kanal vasitəsilə əlaqə saxlayıblar və iki ölkə arasındakı əməkdaşlığın necə ola biləcəyi barədə danışıqlar aparıblar.

“The Wall Street Journal”ın məlumatına görə, ABŞ lideri Donald Tramp ötən həftə N.Maduro ilə telefon danışığı zamanı ona postundan getmək barədə ultimatum irəli sürüb.

“The New York Times”ın məlumatına görə isə N.Maduro və D.Tramp noyabrın 28-də telefonla danışıblar. Liderlər ABŞ-də görüş ehtimalını müzakirə etsələr də, razılığa gələ bilməyiblər.