Vuçiç Serbiyadakı iğtişaşlarla bağlı təcili iclas çağırdı

Serbiyanı kütləvi etiraz aksiyaları bürüyüb.

Belə ki, paytaxt Belqradın mərkəzində Respublika Seçki Komissiyasının binası yaxınlığında silsilə mitinqlərə başlayan “Serbiya zorakılığa qarşı” müxalifət blokunun tərəfdarları növbəti etiraz mitinqinə toplaşıblar.

Onlar şəhərin əsas Kralya Milan küçəsini bağlayıblar. Müxalifət tərəfdarları seçki komissiyasının binasından şəhər administrasiyasının əsas girişinə doğru hərəkət ediblər.

Qeyd olunub ki, nümayişçilər binaya basqın etməyə çalışıblar. Onlar qapını sökmək üçün bayraq dirəklərindən istifadə edib, həmçinin pəncərələri və müşahidə kameralarını sındırıblar.

Nümayişlərlə bağlı Serbiya Prezidenti Aleksandar Vuçiç xalqa müraciət edib.

O bildirib ki, Serbiya xüsusi xidmət orqanları iğtişaşların hazırlanması barədə əvvəlcədən məlumat alıb: “Belqrad şəhər administrasiyasının binasını ələ keçirmək cəhdi inqilab deyil, Serbiya hüquq-mühafizə orqanları vəziyyətə tam nəzarət edir. Biz bir neçə gündür ki, xarici faktorla, baş verənlərlə bağlı xəbərdarlıq edirik. Çoxları özlərini sadəlövh kimi göstərdilər və baş verənləri eşitmək və ya görmək istəmədilər. Tam olaraq nə hazırlandığını bildiklərini və vaxtında cavab verən və hücum edənlərin nə planlaşdırdıqlarını dəqiq bilən kəşfiyyat xidmətlərimizə məlumat verən xarici xidmətlərə təşəkkür edirik”.

A.Vuçiç həmçinin paytaxt Belqrad şəhərində baş verən nümayişlər fonunda Milli Təhlükəsizlik Şurasının təcili iclasını çağırıb.