Xamenei ABŞ-la birbaşa toqquşmadan qaçmaq üçün göstəriş verib

İranın Ali Rəhbəri Seyid Əli Xamenei ABŞ ilə bağlı aydın göstərişlər verib.

Bu barədə "New York Times" nəşri məlumat yayıb.

Nəşrin xəbərinə görə, ölkənin Ali Milli Təhlükəsizlik Şurası məsələ ilə bağlı fövqəladə iclas keçirəcək. Qeyd olunub ki, Şura İraqda İrana yaxın qüvvələrin İordaniyada ABŞ-nin 3 əsgərinin ölümünə və 40-dan çox hərbçinin yaralanmasına səbəb olan hücumundan sonra Ağ Evin cavab addımı atacağından dərin narahatdır.

İranlı rəsmilər bildiriblər ki, iclasdan əvvəl ABŞ-nin İrana hücumu və ya regiondakı proksi qüvvələrə zərbələrlə bağlı bir sıra ssenariləri və bunların olacağı təqdirdə necə cavab veriləcəyi müzakirə olunub.

Sözügedən medianın iddiasına görə, Ali Rəhbər dövlət rəsmilərinə Ağ Evlə birbaşa müharibədən çəkinməyi, İranı amerikalıları öldürən qüvvələrin hərəkətlərindən uzaqlaşdırmağı əmr edib.

O da qeyd olunub ki, əgər Amerika Birləşmiş Ştatları hücum etsə, rəsmi Tehran buna cavab verəcək.